Politika Ambjentali
L-Uffiċċju tas-Segretarju Permanenti
Ministeru għall-Ambjent, l-Enerġija u l-Indafa Pubblika (MEEC)
Indirizz: 6, Triq Ħal Qormi, Santa Venera, Malta
- Dikjarazzjoni tal-Politika
L-uffiċċju tas-Segretarju Permanenti fi ħdan il-Ministeru għall-Ambjent, l-Enerġija u l-Indafa Pubblika (MEEC) hu ddedikat biex iħares l-ambjent, jipprevjeni t-tniġġis, u jtejjeb kontinwament il-prestazzjoni ambjentali fil-funzjonijiet u l-attivitajiet kollha li jitwettqu fl-indirizz imsemmi hawn fuq. Din il-politika tapplika għad-Direttorati u l-uffiċini kollha taħt ir-responsabbiltà tal-Uffiċċju tas-Segretarju Permanenti, iżda qed teskludi l-Uffiċċju tal-Ministru, l-Uffiċċju tas-Segretarju Parlamentari, id-dipartimenti u l-entitajiet affiljati, kif ukoll l-impjegati taħt it-tmexxija tad-Direttorat għas-Servizzi Korporattivi li jaħdmu f’siti oħra.
- L-Impenji Tagħna
2.1 Protezzjoni Ambjentali, Prevenzjoni tat-Tniġġis u Azzjoni favur il-Klima
- Nieħdu miżuri b’mod proattiv sabiex nipprevjenu t-tniġġis u nipproteġu l-ekosistemi naturali.
- Innaqqsu l-emissjonijiet tal-gassijiet serra mill-attivitajiet tagħna u nippromwovu attivitajiet b’emissjonijiet baxxi ta’ karbonju.
- Insaħħu r-reżiljenza għar-riskji marbuta mat-tibdil fil-klima u nikkontribwixxu għall-istrateġiji nazzjonali dwar l-adattament u mitigazzjoni tal-klima.
- Nieħdu kunsiderazzjonijiet ambjentali u tal-klima u nintegrawhom fil-funzjonijiet eżekuttivi u amministrattivi kollha. Dawn jinkludu l-koordinazzjoni, il-monitoraġġ tal-politika, l-involviment tal-partijiet interessati, u t-tifrix ta’ informazzjoni lill-pubbliku.
2.2 Konformità mar-Rekwiżiti Legali u Oħrajn
- Nimxu mal-leġislazzjoni ambjentali, ma’ regolamenti u ma’ obbligi oħra relevanti għall-funzjonijiet tagħna, u fejn il-prattika tagħti lok, nissuperaw ir-rekwiżiti applikabbli.
- Nissorveljaw u nirrevedu l-konformità b’mod regolari biex niżguraw li nkunu konformi kif ukoll naċċertaw it-titjib kontinwu.
- Impenn b’mod sħiħ biex nimplimentaw u nżommu Sistema ta’ Ġestjoni Ambjentali skont l-istandards ISO 14001.
2.3 L-Użu Effiċjenti tar-Riżorsi
- Nużaw l-enerġija, l-ilma u l-materjali b’mod responsabbli u effiċjenti.
- Nippromwovu proċessi diġitali u sistemi biex innaqqsu l-użu tal-karta.
- Nimmaniġġjaw l-iskart skont il-ġerarkija tal-iskart, billi nagħtu prijorità lit-tnaqqis, l-użu mill-ġdid u r-riċiklaġġ.
- Inħeġġu kemm l-akkwist sostenibbli kif ukoll nimxu bi prattiċi ta’ provvista b’mod responsabbli.
2.4 Titjib Kontinwu
- Nistabbilixxu, insegwu u nirrivedu miri ambjentali.
- Nevalwaw il-prestazzjoni b’mod regolari permezz tas-Sistema ta’ Ġestjoni Ambjentali (EMS).
- Inwasslu għal titjib kontinwu billi nużaw ir-riżultati tal-verifiki, id-data, u kummenti oħra li jilħquna.
2.5 Għarfien u Involviment
- Inħarrġu u nappoġġjaw lill-impjegati kollha sabiex jaġixxu b’mod responsabbli u jifhmu r-rwol ambjentali tagħhom.
- Inħeġġu l-innovazzjoni u prattiċi tajbin permezz ta’ inizjattivi interni.
- Ninvolvu ruħna b’mod kostruttiv mal-partijiet interessati, dawk interni u dawk esterni sabiex inżidu l-għarfien u nsaħħu l-kollaborazzjoni għal futur sostenibbli.
- Implimentazzjoni u Komunikazzjoni
Din il-politika tipprovdi qafas biex twaqqaf u tevalwa miri ambjentali fi ħdan is-Sistema ta’ Ġestjoni Ambjentali (EMS) tal-MEEC. Għaldaqstant, din il-politika hija kkomunikata lill-impjegati kollha, u qiegħda disponibbli għall-pubbliku u għall-partijiet interessati oħra fil-binja uffiċjali. Il-politika tiġi riveduta mill-inqas darba fis-sena – jew aktar kmieni hekk kif meħtieġ – biex tiġi żgurata li tibqa’ xierqa, adekwata u effettiva.
Approvata mis-
Segretarju Permanenti
Ministeru għall-Ambjent, l-Enerġija u l-Indafa Pubblika
Data: 05/11/2025
Verżjoni 1.0 – Novembru 2025